Policia greke ka asgjësuar një organizatë kriminale që përpunonte dhe trafikonte sasi të konsiderueshme heroine në Greqi.
Asgjësimi ka ardhur si rezultat i hetimeve intensive dhe identifikimit të pjesëtarëve dhe mënyrës së veprimit të organizatës kriminale.
Pas operacionit të njëkohësishëm në Markopulo dhe Elefsina, policia ka arrestuar gjashtë shqiptarë të moshës nga 28 deri 50 vjeç, dhe një shtetase greke, 30 vjeçe.
Katër prej të arrestuarve u ndaluan në rrugën Korinth-Athinë dhe në njërën prej makinave u gjet një sasi heroine, ndërsa makina tjetër kishte rolin e pararojës.
Tre të tjerët u arrestuan në Markopulos, në verilindje të Athinës.
Policia thotë se kreu i organizatës kriminale ishte një prej shtetasve shqiptarë, me moshë 50 vjeç, që e sillte heroinën nga Shqipëria. Droga, pasi përpunohej magazinohej në vende të ndryshme në Markopulo. Pjesëtarët e tjerë të organizatës kishin për detyrë të gjenin klientë.
Në kontrollet e kryera në banesat e të arrestuarve, në automjetet e tyre dhe vendet e magazinimit u gjetën dhe u sekuestruan:
1,028 kilogram heroinë, 130 gramë metadon në gjendje të lëngët, 1.990 euro, tre automjete dhe 8 telefona celularë.
